اتعلم من حياة رجاء الجداوى

الجميلة ... الرقيقة ... الشيك ... الملتزمة ... المجتهدة ... الصبورة ... صاحبة الارادة ... الصادقة 

رجاء ( نجاة ) الجداوى من مواليد الاسماعيلية ... يعنى المهم انها مصرية ..

 المصرية الجدعة 

أعطت 60 سنة فى الثميل والبرامج والاذاعة وبدأت بانها كانت موديل واشتغلت كمان فى الترجمة 

سمعتها كتير وشفتها فى البرامج وهى بتتكلم 

اكتشفت أد ايه هى محبوبة 

صادقة 

واعية

صريحة

متفاءلة

طاقة ايجابية ماشية على الارض

مجتهدة

صبورة 

عندها ارادة توصل للى هى عاوزاه

صاحبة كل الناس

مهما كان الجيل بتاعك حتلاقيها وصلت لسنك وعارفة تدخل لك وتتعامل معاك

تعالوا نفكر كده مع بعض ... رجاء الجداوى عمرها ما اخدت دور بطولة مطلقة 

ولو كانت غارت من فاتن حمامة أو سعاد حسنى وهما بطلات الاعمال وهى طالعة معاهم كده فى دور صغير 

وكانت رفضت تشتغل معاهم وقالت انا مش أقل منهم وعايزة دور بطولة 

كان زمانها دلوقت قاعدة ف بيتها ما اتحركتش خطوة ومحدش عرفها ومكنتش عملت أكثر من 300 عمل على مدار 60 سنة 

يعنى دى رسالة لكل الشباب انزل اشتغل اى حاجة ... المهم انك تشتغل وتتحرك .

كانت تقول على نفسها مش حلوة واقل جمالا من اخواتها ومنجحتش ف حياتها يمكن اتخطبت 6 مرات 

بس يوم ما اتجوزت اختارت الراجل الصح اللى فضلت مستمرة معاه اكتر من 30 سنة 

وفضلت تتكلم عنه كويس جدا ومخلصة ليه ف حياته وبعد وفاته ..

رجاء الجداوى كانت مش بس بتشتغل ممثلة ... هى بدأت فى الترجمة واستغلت قدراتها فى تعلم اللغات

وشوية شوية دخلت فى الموديل وعالم الموضة لغاية ما شافها مخرج وادالها دور فى فيلم ومنه لفيلم تانى وثالث ورابع

وانهالت عليها العروض والافلام وجالها رزق كتييرررررر ومسرحيات وبرامج اذاعية وتليفزيونية 

يعنى طورت من نفسها وخطوة جابت التانية 

لغاية ما بقت رجاء الجداوى اللى مصر كلها تعرفها ومصر كلها زعلت عليها وياااما جالها دعوات وختمات قران من حب الناس ليها

هاتوا اى برنامج هى فيه واتفرجوا عليها واسمعوا كلامها حتلاقوها بتقول حكم ونصايح من دهب 

فى التعامل مع الناس وتربية الاطفال والعقبات اللى قابلتها ف حياتها وازاى تغلبت عليها

واد ايه هى متواضعة وبتعمل حساب للصغير قبل الكبير

لدرجة انها فى كل برامجها بتتكلم عن العاملة بتاعتها فى البيت

وبتشكر فيها اوى وانها خايفة عليها وبتحبها . 

مرة اتفرجت علي برنامج حسين على الهوا بتاع المقالب وكان عاملين فيها مقلب ان واحد جالهم وقال انه عامل مشروب 

لو حد شربه حيصغر 10 سنين وعملوا فيها المقلب

وجت هى فى اخر الحلقة قالت ان الواحد لما بيتصرف صح وما يظلمش حد وينام ويرتاح هيصحى اصغر 10 سنين 

لانه مظلمش حد ولا افترى على حد .

مبقاش فيه زيها كتير ومش حيبقى فيه زيها نموذج مش حيتكرر ابدا 

رحمة الله عليها وتبقى حياتها واخلاقها صدقة جارية ليها ..