خطوات بسيطة وسهلة للأهتمام بالقدم وببشرتك + ماسكات طبيعية ومغذية للبشرة

السلام عليكم يا بنوتاتى الحلوينيارب كلكم تكونوا كلكم بخير

حتعالوا نتفق مع بعض على خطوات للعناية ببشرتك ...

لتنظيف البشرة :

1- اول حاجة لازم تمسحيها من الميكب لأن مينفعش تعملى عليها أى ماسكات أو سنفرة وانتى مثلا لسه راجعة من برا وبالميكب !!

فممكن تغسليها بصابونة الجلسرين او اى منتج من بتوع الاطفال أو غسول مناسب لبشرتك من اللى جاهزين أو اللى دكتورة الجلدية كاتبة لك عليه

بعد كده بتنشفى بشرتك بالراحة وبالطبطبة مش بالدعك

ولزيادة النضافة ممكن تجيبى قطنة وتحطى فيها نقطة لبن وتمسحى وشك بحركات دائرية حتنضفه حلو اوى اوى

ممكن لو مفيش لبن أو انتى بشرتك جافة تحطى فى القطنة نقطة زيت زيتون .

بكده بشرتك تبقى جاهزة 

فيه ناس بتمسح الميكب الاول بنفس الطريقة أو بمزيل ميكب وبعدين تدخل تغسل وشها باللى يناسبها وبرضه مفيش مشكلة .

2- سنفرة الوجه 

وده بأى وسيلة موجودة عندك سواء جاهزة أو من مكونات عندك ف المطبخ 

فيه ماسكات للسنفرة جاهزة بالفحم أو باللبن أو بأى مكونات ... وفيه سنفرة طبيعى للوجه 

أما زيت زيتون + سكر خشن + نقطتين لمون للتفتيح ولو بشرتك حساسة بلاش ليمون .

أو بن + زيت زيتون 

بتاخدى منها حته على اد الوجه وتوزعيها وتعملى بيها حركات دائرية لوشك لمدة 10 دقايق وبعدين تغسلى وشك

ونفس الحكاية التنشيف بالراجة وبالطبطبة .

3- عمل ماسك للوجه 

وبنفس الفكرة اللى فوق أما ماسكات جاهزة او بتعمليها فى البيت . 

ومن الماسكات دى (الطبيعية)

كركم + زيت ذرة مثلا أو زيت زيتون + زبادى + رز مطحون أو حمص مطحون 

خدى معلقة من كل حاجة وقلبيهم كويس وحطيهم على وشك نص ساعة بعد السنفرة وبعد ما ينشف أفركيه واغسلى وشك بالماء فقط .

بن + عسل +جيلاتين 

اخلطيهم كويس اوى وحطيهم على وشك لغاية ما ينشف وشيليه .

معلقة نشا أو دقيق + زيت لبنان الدكر أو زيت لوز حلو + بياض بيضة + نسكافيه بلاك أو بن قهوة 

واخلطيهم بكميات متساوية وحطيهم على وشك 

الماسك ده تحفة خصوصا لو عملتيه يوميا بيفتح وبيزيل التجاعيد الخطوط البسيطة دى وبينعم جدا 

دقيق + لبن + عسل 

اخلطيهم بنفس الطريقة وحطيه على الوجه لغاية ما ينشف 

نشا +لبن + عسل واعمليه بنفس الطريقة 

4- الخطوة الاخيرة الترطييب 

اما بكريم مرطب زي نيفيا سوفت يكون خفيف على البشرة أو ممكن تعملى سيرم 

( زيت الارجان أو الخزامى أو اللوز + فيتامين E )

وبتدهنى بيه وشك الجميل كخطوة أخيرة قبل النوم .

أما العناية بالقدم بقى :

1- تحطيها فى ماء ساخن + شاور جيل من 10 دقايق ل ربع ساعة 

2- تعملى ليها سنفرة سواء بوصفة طبيعية أو منتجات جاهزة زى ما أتكلمنا فوق عنهم .

3- إزالة الزوائد الجلدية .

4- الترطيب . 

أتمنى يكون التوبيك عجبكم وعايزة دعوة حلوة بقى