فوائد بذور الكتان للجسم والشعر والبشرة وازاى نستخدمها ونستخلص الجل بتاعها على السخن وعلى البارد ؟ + ماسك هدية

السلام عليكم  .... كل سنة وانتم طيبين وربنا يعود عليكم الايام بخيرعايزين نتكلم فى التوبيك ده عن ((( بذور الكتان )))

وأد ايه هى مهمة ومفيدة للشعر وازاى نستخدمها فى الاكل وللشعر وللبشرة وازاى نعمل الزيت بتاعها وازاى نستخلص منها الجيل بتاعها على البارد أو سخن ومين اللى يقدر يستخدمها وايه هى فوايدها اصلا  ؟

أولاً بذور الكتان ده شكلها

زى ما شفتوه ف الصورة وحتلاقوها عند فتح الله او أى سوبر ماركت كبير أو أى عطار ...

وحالياً كمان ممكن نطلبها اونلاين على النت .

ثانياً فوائدها 

1- للجسم ولصحة الانسان :

بذور الكتان مليانة اوميجا 3 و بتحسن الجهاز الهضمى، وبتعمل على تخفيف الامساك ، وبتساعد كمان على تقليل الكوليسترول ف الدم اللى بيساعد جداااا فى تقليل أمراض القلب .، وبتساعد كمان فى التخسيس 

فلكل اللى بيعانى من أى حاجة من اللى قلتهم فوق يعمل الوصفة دى ويدعى لى :

م.ص بذور كتان + علبة زبادى + عصير مون 

وتاكلها مرتين ف اليوم مرة الصبح على الريق ومرة بالليل قبل ما تنام 

فى خلال اسبوع هتحس بتحسن ملحوظ جدا ف راحة الجهاز الهضمى والبطن حتخفى .

ملحوووظة هامة : اطحن بذور الكتان قبل الاستخدام مباشرة علشان لا تفقد فايدتها 

يعنى مينفعش تطحن شوية محترمين كتااار وتحطهم ف برطمان وتاخد منهم عند الحاجة !! مش حتجيب النتيجة اللى احنا عايزينها .

ثالثا فوائدها للبشرة :

زى ما قلنا انها مليانة اوميجا 3 نباتى، وده بيخليها ترطب البشرة، وتحميها من الجفاف ، وبتحمى الجلد من الالتهابات والأحمرار والطفح الجلدى ، وبتساعد جداً فى تفتيح البشرة،  ومعالجة الشيخوخة ومعالجة جروح البشرة ،وبتخلصها من الحبوب وبتنعم الوجه ،وبتساعد على تقشيره 

لتفتيح الوجه حطى بذور الكتان المطحونة مع لبن وعسل .

                لشد الوجه حطى جل بذور الكتان مع عصير الخيار وامسحى بيها وشك بعد ما تسبيها شوية ف التلاجة او اعمليهم مكعبات تلج .

                للتخلص من الحبوب كليها كل يوم وممكن وصفة الزبادى تنفعك جدا هنا .

رابعا فوايدها للشعر :

هاتى كمية من بذور الكتان حسب طول شعرك + زيت طبخ بس بلاش زيت التموين الله يكرمكم ههههههههههه + زبادى 

ولو شعرك جاف جدا جدا حطى زيت زيتون او زيت جوز الهند 

ولو بتعانى من شيب الشعر ضيفى بذور سمسم مطحونة على الوصفة دى 

نعمل تدليك للفروة ونوزع بقيته على الشعر ونلف الشعر بكيس لمدة نص ساعة . 

طيب ... لو انتى مش حابة الوصفات الكتير دى وف نفس الوقت عايزة تستخدمى بذور الكتان لشعرك علشان تستفيدى بيها 

يبقى تستعملى يا قمر الزيت بتاعها .

خامسا كيفية عمل زيت بذور الكتان ؟

حتجيبى معلقة كبيرة من بذور الكتان + 5 معالق زيت أكل 

وحطيهم فى ازازة غامقة فى مكان ضلمة ورجيها كل يوم لمدة اسبوع وبعدين صفى الزيت واستخدميه للشعر .

سادسا كيفية عمل جل بذور الكتان : 

ممكن نعمله على البارد وعلى الساخن ......

وهناك اعزائى المشاهدين اختلاف فى هذه النقطة فبعض الناس يقولوا نعمله على البارد علشان يحتفظ بفوايده وهناك من يقول سواء على البارد او الساخن

ففوايده هى هى 

انا شخصياً جربت أعمله على البارد وحسيته قليل اوى وزى الميه 

انما لما عملته على الساخن كان جل فعلا 

وأولاً وأخيراً القرار ليكى يا برسنسس 

لو على البارد حتجيبى معلقتين أو 3 كبار من بذور الكتان وتحطى عليها ماء ساقع ف برطمان مثلا وتسبيها يومين ف التلاجة 

فحيطلع الجيل لوحده 

بعد يومين طلعيها وصفيها واستعملى الجل .

لو حتستخلصيه على الساخن 

فحتجيبى اصغر حلة عندك او كنكة 

وتحطى فيها نفس كمية بذور الكتان وحتسبيها على نار هادية واول ما تغلى قلبيها وتابعيها حتلاقى الميه بدأت تتقل وتتحول لجيل 

طفى عليها وسبيها تبرد خالص وصفيها وممكن تحطى للجل ده جلسرين و زيت لوز وتدهنى بيه شعرك بيطريه جدا جدا وبيغذيه .

وفى الاخير يالا بينا نعمل الماسك التحفة ده هدية منى ليكم 
أوقات كتير لما بنعمل وشنا بيلتهب أو بيطلع لنا حبوب أو قرب وقت البريود أو الحالة النفسية أو لخبطة هرمونات أو وأحنا راجعين من مصيف 
بنلاقى بشترتنا فيها حبوب وغامقة وفيها تصبغات !!!
فكل اللى عليكى تعملى الماسك ده :
كركم مطحون + زيت الوز المر + لبان دكر مطحون + عسل + ماء دافىء