حبايبى الحلوين...عاملين ايه ؟كل سنة وانتوا طيبيبن وبخير يارب
انا قررت أكتب الموضوع ده بعد ما بقالي أكتر من شهرين بروح لدكتورة الامراض الجلدية بسبب الزفتة الصابونة دى !!طبعا فيه أنواع تانية من الصابون بس انا مجربتهاش ... انا بتكلم عن الصابونة دى تحديدا لانى جربتها وغيرى كتير حصل لهم زيي .
القصة بدأت انى جربت وسائل كتير جدا وحكلمكم عنها بعد ما اخلص حكاية الصابونة وكنت قاعدة على الفيس فصحبتى بعتت لى جروب بيبيع حاجات أونلاين وورتنى الصابونة دى
فشفت ليها فيديو وقررت اشتريها لأن الفيديو كان وهمى بصراحة وعجبنى أوى أوى ...
فبعت للصفحة رسالة على الخاص وقلت لها عايزة من الصابونة وقالت لى حاضر واتفقنا على السعر والمكان اللى حنتقابل فيه .نزلت واستنيتها طبعا كالعادة اتأخرت عليا جدا فبقيت ألف على المحلات،وادخل واقيس حاجات علشان أضيع وقت لغاية ما تيجى .
وبعد حوالى ساعة الا ربع الهانم وصلت واديتنى الصابونة كانت عاملة 100 ج وقالت لى طريقة استخدامها واخدتها وروحت ...
بدأت انفذ الطريقة وهى كالاتى :
1- الصابونة عبارة عن حاجتين : كيس فيه بودرة لونها رصاصى + صابونة الليزر لتقليل نمو الشعر !!
2- فتحت الصابونة وفتحت الكيسة اللى فيها البودرة لقيت ريحتها حادة اوى بالضبط زى ريحة كريم وان one cream لازالة الشعر .
3- بدأت اطبق طريقتها جبت كوب ماء وحطيت معلقة واحدة بس معلقة أكل وفضلت أقلب أقلب والميه ما تقلتش زى ما قالت لى
كأنك مثلا بتعملى نشا أو سحلب لما بتحطيه على النار وتقلبى كتير بيتقل معاكى انما البودرة بتقلبى من غير نار
فبعت لها على الصفحة وقلت لها الميه خفيفة
قالت لى ما تزوديش وسبيها وأستمرى فى التقليب وعملت كده فعلا
وبعد كام دقيقة لقيتها قلت وبقت زى السحلب التقيل كده .
4- دخلت الحمام وفتحت الدش على ميه عادية زى ما قالت لى مش سخنة من السخان لان غلط جدا .
5- بدأت اوزع الصابونة اللى قلبتها على كل الجسم بسرعة جدا وبمجرد ما خلصت ما اخدت وقت خالص لانها زى الميه اللى بتترش وتتوزع بس اتقل شوية من الميه فمش بتاخد وقت خالص.
6- المهم بعد ما خلصت توزيع بدأت اشيلها بفوطة زى ما البنت قالت لى فاختارت فوطة مش محتاجاها صغيرة كنت بروح بيها الجيم واتبهدلت شوية من كتر الاستخدام والغسيل وقلت لو باظت مش مشكلة انى ارميها .
7- بدأت امسح جسمى من المكان اللى بدأت اوزع منه للمكان اللى خلصت فيه كنت بدأت من رجلى لغاية فوق .
8- طبعا الفوطة بقت سوووووودة من الشعر بس مش دى المشكلة ... المشكلة انى بمجرد حطيت الصابون ده على جسمى حسيت بحرقان فورااا .
ولما شيلته لقيت الحرقان لسه موجود برضه !!
9- شطفت جسمى بالميه العادية تحت الدش زى ما قالت لى وكنت حاسة بنااااااااار بعيد عنكم.
10 - استخدمت بقى الصابونة التانية اللى مسمينها صابونة الليزر كانت ريحتها حلوة بصراحة وعملت رغوة معايا وقلت بينى وبين نفسى اهى يمكن تهدى جسمى شوية !!
11- خلصت وقفلت الدش ولسه برضه حاسة بحرقان فى اجزاء من جسمى فبصيت ف المرايا و
اتصدمت !!!!!!!!!!
اتصدمت !!!!!!!!!!
لقيت المناطق اللى بتحرقنى دى اتحرقت ومش حرق عادى ولا سطحى ده من الدرجة التانية أو الثالثة .
12- زعلت على نفسى اااااووووووووووى وجت لى زى صدمة كده معيطتش بس مجاليش نوم ورحت الشغل مكنتش عارفة اشتغل ولا عرفت استأذن بدرى ولا أكلت ولا شربت .... المهم خلصت شغل ورحت لدكتورة جلدية قريبة من بيتى واتعاملت معاها قبل كده دكتورة شاطرة اوى.
13- المهم اول ما شافتنى اتصدمت هى كمان !!!! وسألتنى ده من ايه وحكيت لها
قالت لى اوووووووووعى تجربى الحاجات دى تانى .
وكتبت لى كريمات وبرشام وحاجات وصلت ل 300 ج
رحت فورا جبتهم من الصيدلية ولما روحت بدأت على طول استخدم العلاج .وبعد مدة لما جت الاستشارة رحت لها على طولبس المشكلة ان الدنيا كانت باظت أكتر .... لأن الحرق زى ما انتوا عارفين لما بتكون درجتة عالية بيعمل زى بلالاين كده منفوخة وبتطلع ميه وصديد !!
ربنا يعافيكم يا حبايب قلبى
فغيرت لى العلاج ورحت جبته،وطبعا ده غير الكشف والاستشارات فرميت بتاع 1000ج كده على الارض وجبت لنفسى الهم والمرض والقرف
لا اله الا انت سبحانك انى كنت من الظالمين
وبعدها حصل موضوع الكورونا والدنيا اتقفلت بس كنت منتظمة فى العلاج ولحد اللحظة دى والحرق لسه معلم ف جسمى.
فبجد نصيحة يا بنات اووووعوا تستخدموا الهبابة دى .... ودى كانت رسالتى اللهم بلغت اللهم فاشهد.
ومحبش أن حد يتأذى زى ما أنا اتأذيت، وطبعا مش أنا أول ولا أخر واحدة
أتحرق منها .
اللى زهقت لغاية كده تدعى لى دعوة حلوة وتقفل الصفحة
واللى عايزة تكمل تضغط على
تعليقات
إرسال تعليق