السلام عليكم يا احلي ناس فى الدنياعاملين ايه ؟اكيد معظمنا اتأثر بفيرس الكورونا اما ف شغله او فى عيلته او ماديا او حتى نفسيا وده الاكيد كلنا خوفنا مفيش شك طبعا .
أولاً وأخيراً هى أزمة .... حتاخد وقتها حتى لو قعدت سنة وكللللنا حنتعايش ، وكلنا برضه عارفين أن كل واحد بياخد نصيبه بس اهم حاجة انك بتاخد بالاسباب ....
* تغسل ايدك دايما .
* ما تلزقش فى حد
* بلاش بوس واحضان محبكتش يعنى.
* اهتم بنظافتك الشخصية .
نيجى بقي للناس اللى تضررت ... اكيد سمعتوا عن العمل الحر او
الفري لانسينج free lancing
وده معناه انك بتقدم خدمة قصاد فلوس وده طبعا بيختلف من حد للتانى وطبعا له مميزات كتير منها :
$ ممكن تشتغل على النت.
$ بتتحكم فى الوقت حسب ظروفك.
$ مفيش مدير رخم مريض نفسيا وعنده عقدة نقص بيتحكم فيك !!
$ من هنا بقى جت افكار كتيييير.
$ فيه طبعا جزء من الشغل الحر لازم تنزل فيه بنفسك وتشتغل وما تنساش تعمل اللى عليك من التعليمات وتلبس الكمامة .
***** طبعا انا كلامى عام اقصد بيه الرجالة والستات...
1- بالنسبة للأمهات أو المدرسات تقدرى تألفى قصص للأطفال وتطبيعها وتتباع فى دار نشر تمسك لك الحكاية دى.. أو تعمليها على النت وتنزليها فى مواقع الخدمات زى خمسات او منجز او كفيل .
وطبعا طبقى فى المواقع دى أى خدمات تقدرى تعمليها مقابل الفلوس .
2- ممكن تعملى أشكال جبس للأطفال يلونوها وده مش حيكلفك حاجة كلنا عندنا قوالب فى البيت بتاعة الكيك ممكن تعملى منها كده وتبيعيها ، وسهلة جدا فى عملها وتسويقها .
3- ممكن تعملى استضافة للأطفال بيبيى سيتر baby sitter فى بيتك أو أنتى تروحى لهم بوقت عمل ،وأجر معين.
بس أكيد فى بيتك يكون أفضل وتعملى أكل صحى للأطفال وتشغلى لهم كارتون على كام لعبة وتفضى لهم مكان فى أوضتك أو أوضة الأولاد ميكنش فيها حاجة خطر يتخبطوا فيها وتعملى لهم شوية رسومات يلونوها وحروف وكلمات يتعلموها على صلصال يلعبوا بيه .. حيبقى مشروع مربح ليكى وفى بيتك ومضمون خصوصا لو كنتى أم أو معلمة فدى حتبقى لعبتك .. خصوصا ان فيه أولياء أمور كتير شغالين وأولادهم كانوا بيروحوا الحضانة ودلوقتى الدنيا أتقفلت ومش عارفين يتصرفوا .
4- ممكن تعملى من الجبس برضه ترابيزات او فواحات مشروع مربح وسهل ،وحيعجب الناس وابدعى فى تزيينها وسوقيها على النت .
5- ممكن تعملى أى حاجة تبع الموسم اللى احنا فيه يعنى مثلا لو فيه رمضان اعملى زينة وفوانيس رمضان ودلوقتى بقى فيه أفكار بالهبل بجد بيعملوا فوانيس من الزبالة !! من كياس الزبالة السودة والملونة ومن علب الكانز كمان اه ولله العظيم .
لو فى العيد تعملى لعب أو تتفقى مع تاجر جملة تبيعى اللعب على النت تصوريها ،ويطلع لك منها مكسب.
لو بتحبى التفصيل فصلى اسدالات أو عبايات أو طرح تنفع فى رمضان .
6- ممكن بقى تستغلى الحاجات اللى عندك مش بتستخدميها لو حالتها كويسة ممكن تصوريها وتبيعيها على النت ، ولو حالتها مش أد كده اعملى اعادة تدوير ليها ، واستخدميها لنفسك أو بيعيها .
انا اعرف واحدة عملت من السيديهات الفاضية وبكر المناديل والفوم مقالم وباعتها وخدت منها لنفسها ووزعت هدايا على اصحابها .
واعرف واحدة تانية كان عندها برطمانات ازاز وبلاستك كتير اوى زينتهم ورشتهم بالفضى والدهبى وباعتهم كان شكلهم تحفة ، ومكلفوهاش حاجة .
7- ممكن تعملى حروف كبيرة الحجم من ورق الفوم وتحشيها بالاسفنج والحرف بيتحط على الترابيزة بيبقى ديكور تحفة وحجمه كبير .
8- ممكن تعملى حروف للأطفال من ورق الجليتر اللى بيلمع أو من الجبس هيحبوها اوى ويحبوا التعليم .
9- ممكن تعملى مشروع الصابون فيه بالبقدونس او اللبن والعسل او الكركم ، وده حلو اوى للبشرة ، ومن الوصفات التجميلية وحينفع بنات كتير اوى .
10 - ممكن تعملى صابون مخصوص للأطفال وده بتستخدمى فيه صابون الجلسرين الشفاف وتحطى لعبة جواها حتكسبى منه حلو اوى لأنه حيعجب ناس كتير وحيشجع الآطفال على غسل ايديهم علشان يوصلوا للعبة لما الصابونة تخلص .
11- ممكن تشترى معطرات جو أو سجاد أو غيره من الحاجات المهمة فى كل بيت بالجملة وتوزعيها على المحلات والصيدليات .
12- ممكن تشتغلى فى التصوير فوتوسيشن أو عربيات أو منتجات بكاميرا جودتها حلوة لبيع المنتجات دى.
او فيه مواقع بتبقى عايزة صور فلو انتى بتصورى مناظر طبيعية او البحر وكده ممكن تبيعالهم وتكسبى .
13- ممكن تعملى دليل لتجار الجملة مثلا او لاى فئة من المحلات المطلوبة وتوزعيها بمقابل مادى وتعملى منها نسخة على النت .
14- ممكن تعملى لنفسك مدونة شخصية او عن موضوع معين عندك خبرة فيه ، وتكسبى منها مع الوقت .
15 - لو بتحبى الزراعة ممكن تزرعى فى بيتك نعناع أو فلفل أو تشترى البذور النادرة شوية والغالية وتزرعيها .
16 - ممكن لو بتفهم فى حاجة معينة تعملها على شكل كورس وتنزله على النت وتبقى كورسات اونلاين .
لغة مثلا أو كمبيوتر أو برمجة أو فوتوشوب .
17 - ممكن تعمل قناة يوتيوب وتشرح فيها الحاجة اللى بتفهم فيها بس هى حتاخد وقت شوية عمال ما ييجى لك منها ارباح لأن فيه شروط لازم تنفذها 4000 ساعة مشاهدة و1000 مشترك .
18- ممكن تعملى مدونة او قناة او انتى وصحابك وتعملوا وصفات تجميلية ماسكات وحاجات زى كده او وصفات طبخ لو انتى شطورة فى المطبخ .
تعليقات
إرسال تعليق